光陰似箭，蘋果教主喬布斯蒙主寵召近兩年半，但人氣仍然旺盛，經常成為傳媒話題。《華爾街日報》有位跟開蘋果動向嘅前記者Yukari Iwatani Kane，近排喺佢本新書爆料，話喬布斯覺得電視產品難搵食，所以冇諗過「叉」隻腳落去。
據作者所講，蘋果喺2010年搞咗個高層會議，喬布斯講明問乜都得，有位仁兄單刀直入，話外界盛傳繼iPhone同iPad後，電視會係公司下個革命性產品，問呢單料堅定流。喬布斯立即否認，直言電視係一門非常差勁嘅生意，冇肉食之餘亦難賺錢，所以冇意推出電視產品。
但喬布斯係咪真係咁諗就鬧羅生門，事關據著名作家Walter Isaacson幫教主寫嘅自傳所講，喬布斯曾提及已成功打造類似Apple TV機頂盒嘅產品，究竟邊個版本先真，真係天知曉。