上星期本欄提及在中環萬邦行外撞到一位史丹福大學校友L君，佢話昔年在史丹福工程學院讀到抽筋，故此依家佢覺得幾奇怪，點解本地大學生讀書好似甚為輕鬆。
中大工程學院院長汪正平教授接受《經濟日報》訪問（三月十一日），提供咗一個答案。汪教授係1950年代難民（新移民）學生，在元朗中學畢業，考入中大中文系，讀咗三個月就去咗美國普渡大學（以工程學著名）讀化學，再到賓夕凡尼亞州立大學，得博士學位，加入貝爾實驗室工作19年，成為美國電機及電子工程師學會院士，後到喬治亞理工學院（亦以工程學聞名）做教授，2010年應劉遵義校長力邀回港做中大工程學院院長，2013年獲選為中國工程學院院士。
做得美國、中國工程學院院士，有「現代半導體封裝之父」嘅美譽，當然進入權威學人之列。汪教授平時有空，鍾意「落區」，親自到課室旁聽，以了解今天中大學生上堂情況，佢發覺一啲坐在後排嘅學生喜歡打機、發短訊、瞓覺，令佢好生感慨：香港學生幾經辛苦先至入到大學，但入到去就有啲人無心讀書。美國一流大學睇學生睇得好嚴，成績不好就掃出門，但香港極少極少肥學生出校嘅。汪教授認為主要原因就係大學教育資助委員會撥款俾大學，按學生人頭派錢，大學自動削減學生，財政上幾唔化算！
最近講到大學排名，中大各學院、學生、校友都有意見，據一啲校友聽到，中大諸學院之中，工程學院對爭取排名最為着緊，認為中大應該重視之，否則如逆水行舟，不進則退。事實上，如果大學排名低，對學生有直接影響，譬如中大學生每年積極爭取到外國做交換生，但美國著名工程學校如喬治亞理工學院、普渡大學、伊利諾大學等不會與排名低嘅外國大學交換學生，外國大學甚為講究竹門對竹門，成績唔夠（GPA 3分或以上）嘅學生，要到呢類大學做交換生，亦有難度。一啲空口講白話嘅學生話中大不應重視排名，或者係掛住搞活動，學生會第一，讀書第二之類。要成為一流大學，決不能自甘平庸，要常懷追求卓越之決心。