民間智慧，馬年、羊年向來對經濟以至股市都係折騰之年，好難搵食，Samantha上周見到全球股市的表現也不得不信邪。烏克蘭呢條拉緊的橡筋，嚇到道指與標指均創7周以來的最大單周跌幅，強國經濟甩轆，A股未失守2000，港股先打三十大板，逾千隻股份繼續下跌，唯一可做是沽貨套現，換入績優、防守能力較高的股份，母企為美的集團的威靈控股（382）是其中一隻。
節能補貼完結，加上強國經濟增長放慢，卸了厚厚的妝後，終於要以真材實料見人。威靈從事摩打、電機等家電心臟部份，集團剛公佈2013年業績，純利為7.85億元，按年增22.7%，營業額亦提升14%至88.82億元；毛利率亦增加0.3個百分點，達16%，流動比率為152%，呢份成績表唔只見得下人咁簡單，公司亦識做，豪派末期息8.5仙，較去年同期多77%！
國民收入增加，對家電需求有增無減，加埋美的今年2月建立電子商貿公司，去年亦相繼在天貓、京東、蘇寧易購等平台買賣銷售，買電器唔係買棵菜，作為家電龍頭有優勢，美的亦估計電貿銷售會由去年40億元，倍增至80億元。而最緊要的是，威靈在環球摩打市場中佔有逾三成，三星、LG等都係佢客仔，食盡歐美復蘇與電貿概念，劣市下必成甚佳的守門員。
Samantha
本欄逢周一、三、五刊出