上周指試沽騰訊（700），結果騰訊跌咗成隻滙控（005），成80蚊雞，本來寫咗成段認屎認屁，但歸根究柢只是好彩。微型對沖基金仔倉位中仍有其他股捱緊價，睇吓有乜好路數好過。騰訊最新策略部署如何？筆者已預約做一個獨家專訪，業績後留意吧。
世界盃倒數不足90日，最強世界盃概念到底如何呢？有，真係有，唔係講笑！並不是體育用品股，也不是甚麼機票旅遊股，而是持有「創造球會」這隻遊戲App的公司，一定食到最應。而持有此遊戲的企業，叫壹傳媒（282），死未！
容易沉迷 付費玩家無數
壹傳媒以「nxTomo」品牌經營四種新媒體類別，包括資訊類、電子商貿、娛樂及社會時事等，即是大家此秒鐘睇緊我這編文章的「動新聞」等等啦。當中遊戲包括「人生罪惡」及「創造球會」等較多人認識的手機遊戲，截至2013年9月30日，仍然處於虧損狀態。
不知大家是否經常玩手機遊戲，近年熱爆的遊戲都是可以免費任人玩，如你想勁啲才在遊戲當中買網上道具，稱in-App Purchase，確有人可以一直不課金（付費）一直玩，然後人性心理總會在某一刻「不如畀少少玩啦，都唔係好多錢箒」，大部份人都總會某天突破這條界線。一突破這條界線，不得了，中晒伏！
話說筆者很少玩game，但也算了解這行業生態，某些game筆者會以試驗性質的方法去觀察現在市場上的遊戲如何演變，聖誕後朋友介紹「創造球會」話好正！咁我咪download試吓，玩咗20日，由於本身唔睇波又唔踢波，感到沉悶。突然發現身邊有其他朋友都玩此game，仲好高level，筆者天生的鬥心即時自動彈出，經老友指點點玩法之後，喂真喺好玩啲喎！即時繼續玩，升吓level咁，到第40多天，此遊戲搞一個推廣，筆者參與其中，一抽即抽中丹尼爾艾維斯，又抽中李華度、方亭、尹佩斯等名星球員，玩法趣味自然大增，此時，筆者知道自己已經中計，因為筆者已經課出第一金，還不是課一次，是連環數次！
更重要的是，只要這個「不如畀少少錢呀」的缺口被打開，這度門將會經常為我打開！呢次真的中晒招啦！而這隻遊戲的趣味性，也在於並不只是玩踢波，也要計算球員的能力值如何分配，唔係話李華度就一定贏，搞錯能力分配可以輸給老夫子。再者不同玩家（即球隊）可以交易球員，令到玩家的真實性增加，就自然更為投入。
可交換球員 真實性提高
筆者又抽中巴洛迪利，我唔睇波真喺識佢老鼠，之後電視開始經常播放世界盃的資料，剛巧見到原來巴洛迪利是意大利隊的球星；嘩，咁玩家啲投入感就增加好多噃！在趣味性及投入感大增之下，自自然然樂意繼續玩，只要肯繼續玩，就唔怕你唔課金，好似賭王咁講，「唔怕你叻唔怕你呆，至怕你唔來」！
筆者也玩過大熱的「Candy Crush」，玩了一個月都無就棄game，但「創造球會」特別在於球迷在全球，而球會的比賽是不會停的，那麼這個遊戲就會有一群固定的玩家。
如果大家以為筆者從個人體驗出發太輕佻的話，你太out，筆者由2G直跳到4G，三個月之後就瞓身買騰訊，你就要知洞察力的分野在於看見別人看不見的。「創造球員」定期都會搞盃賽，由筆者第一次玩盃賽，level 25都輕鬆進級，到而家level 50，要忍得辛苦才可以進級，然後快速被踢走，你就要知道，玩家越來越多，也越來越專！暫時有否盈利數字根本不重要，只知道這game一定是最強世界盃概念！講到咁，但其實筆者一定不會買壹傳媒的股票，除非佢老細不是黎智英。大家見王維基、劉進圖、大班就知道，傳媒並不是外界所想的數字咁簡單，而這一個範疇，筆者無意、也無能力進入。不如專心踢好自己隊波好過，而我隊波叫「中國銀盛七巧基金」，歡迎各爆level同道人加朋友打盃賽，哈哈哈！
吳家順
中國銀盛資產管理董事、Mensa會員
http://www.facebook.com/1234567.com.hk
本欄逢周一刊出