千禧年代《哈利波特》風靡一時，相信唔少人就算唔係書迷都係電影迷，估唔到財爺曾俊華都係粉絲之一！
佢喺網誌透露，上周去咗香港專業教育學院（VTC），見識唔少新嘅印刷技術，其中嘅「擴增實景」技術，可以將印出嚟嘅圖片，配合平板電腦嘅軟件去睇，圖片唔止3D，仲識郁。財爺十分之興奮，話如果報紙用到呢種技術，《哈利波特》裏面出現嘅「魔幻報紙」就可以面世，到時睇報紙就更加有趣。
講開報紙，原來財爺同報界都有淵源。當年財爺喺紐約讀中學嘅時候，就喺唐人街嘅中文報紙做過兼職，放學去執字粒。不過佢就話因為唔熟手，所以執一篇幾百字嘅短文，都要花上成粒鐘，做完雙手染滿墨迹。
去到麻省理工讀大學，財爺都仲係要印嘢，不過就唔係報紙，而係好似𠵱家上莊嘅大學生咁，宣傳活動時要印單張。財爺當年唔係搵印刷公司幫手，而係親手做印刷用嘅絲網。