做港交所（388）董事嘅待遇真係幾好。港交所將於下月16日舉行股東會，其中一個決議案有關加董事人工，建議主席同非執董分別加薪67%同17%，參與其他委員會又建議有人工加，唯一一項冇建議調整嘅，係每次出席委員會會議嘅酬金，維持3,000大元。
上市公司獨董嘅袍金一般都係20萬、30萬元，港交所嘅獨董袍金相對豐厚，起碼有70萬、80萬元，主席周松崗舊年就有191萬元（包括出任LME非執董薪金）。
港交所主席同非執董目前分別袋90萬同60萬元，參與其他委員會，任主席同成員分別再有12萬同9萬元，加加埋埋都幾多。有趣嘅係，董事每次出席委員會會議又有3,000元。查實董事們已經有酬金，點解每次開會又要另計呢？車馬費都唔使咁多啩？