馬會大董兼恒隆地產（101）董事總經理陳南祿（Philip）舊年新買番嚟隻馬仔「天時地利」噚日首度出賽，賽前都唔係咁被睇好，點知曳到跑包尾，都話祿哥嘅馬運相當一般㗎啦。
Philip隻天時地利噚日跑第二場，佢跟太太，即係美心太子女伍淑恩都係馬主，隻馬首度出賽，當然一齊到馬場為隻馬打氣。雖然馬仔唔多聽話，但現場見到兩人都好平常心，跟友人依然談笑風生。
咁又係，Philip喺商場打滾幾十年，見盡風浪，輸馬仔區區小事又算得係乜呢？
不過，睇往績，Philip嘅馬主運認真麻麻哋，第一匹馬「有機可乘」一場賽事都未跑過，就因為健康問題而提早退役。舊年退役嘅「時時有機」，2008年第一次出賽贏出，可惜之後表現一般。希望天時地利只係一時失手，下次跑出為Philip帶來豐厚獎金啦。