剛剛先講當炒股有𤓓味，上周五即刻爆發小股災。阿爺叫停虛擬信用卡及QR Code支付等互聯網金融業務，一眾科網支付股份齊齊插水，龍頭騰訊（700）更一度下試50日線，對上一次騰訊失守呢個中線支持位，要數到舊年11月，當時唔夠一星期已成功收復失地，且看股王今次係咪依然神勇。
大市未chok完，短線入市宜打游擊，並嚴守止蝕，今日從三方面着手，畀三個選擇戰友參考。
簡單從圖表出發，彩票股華彩控股（1371）上周五早段跌近一成，下試橫行區0.8元水平，午後即由低位急抽，應該已將短炒客震走，或可延續反彈之旅。通告方面，持股量大減至不足5%嘅雅天妮（789）葉英琴，因希望有更多時間陪伴家人，故辭去執董兼副主席職位。早前疑似炒賣殼嘅雅天妮，已由高位回落近兩成，呢個消息有望將炒風再起，不妨留意。至於業績股，可留意載通（062）旗下路訊通（888），三個字講晒︰平靚正！全年盈利按年上升四成至1.05億銀，現價市盈率14倍，以其業務穩定性計（主打各類型巴士廣告），絕對合理。派息比率繼續維持100%，息率接近7厘，加上有3.6億現金在手，相當於市值三成，在如此波動市下，肯定吸引資金垂青。
唐牛