馬刺喺上周五NBA常規賽主場119:85大炒湖人，9連勝之餘，仲刷新多項紀錄，認真威水。馬刺淨勝湖人34分，破咗72年贏32分嘅紀錄；今場勝仗另一重大意義，係「3老」鄧肯、真路比利同埋柏加由02年開始合作，同時上陣嘅第491勝，超越咗湖人80年代「showtime」時代嘅渣巴、魔術手莊遜同埋米高谷巴組合嘅490場，只係比昔日塞爾特人3巨頭巴利殊、小鳥布特加上麥希嘅540勝少。真路比利喺賽前仲帶埋對孖仔落場湊熱鬧（圖）！馬刺今仗上陣嗰13個球員，全部都有得分、助攻同籃板，係NBA咁耐以嚟第一次，講真一場波會出動13個球員都已經唔常見。
湖人都唔執輸，今季屢創新低，今場波亦破埋58年同75年嘅紀錄，單季11次輸至少20分；兼且喺數字上都確定埋冇份打季後賽。