今日馬場有盛事，就係2013/14打吡大賽，只限4歲馬參加，全世界嘅馬主、練馬師與騎師都渴望一生至少贏到一次打吡冠軍，贏得愈多愈好，故此打吡賽必然「打甩髀」，冇人情講，冇讓賽，冇詐詐諦諦等狀況，各路人馬必定全力拼搏，贏唔贏則係另一回事。
今年打吡賽，盃王練馬師約翰摩亞出四隻，即大馬主李福鋆夫婦嘅1號「步步友」、張宇人議員嘅死黨鄭強輝隻2號「威爾頓」、著名外籍馬主包大偉嘅4號「風花雪月」，以及旅遊界名人黃士心隻13號「旅遊大哥」，大摩對南華早報講，「威爾頓」不怕排到第10檔，後上有利，「步步友」會跑得前啲，直路鬥衝，「風花雪月」弗得交關，騎師郭能有信心，另外柏寶最後試跑之後，話「旅遊大哥」狀態極佳，有望跑到三至五名喎。咁講法，大摩容乜易出四隻就一、二、三、四咁操兵返嚟，攞埋四連環？
世界是否咁容易？未必嘅，「梁粉」羅范椒芬在北京講特首普選如是云：「任何人如成為候選人，我們都要視他有機會成為特首，隨時一個好熱門的人都可以落馬，反而有些候選人會爆冷出現。」選特首與跑打吡同是一生難得機會，輸了便無下一次，自1997起香港特首候選人輸了一次，就以後唔再參選啦。故此邊位候選人如有機會「入閘」，必定希望有機會贏出，例如梁振英在2011曾係大冷門，但入到閘（獲提名後），咪將公認熱門唐英年擊退？羅范係CY軍師，深明此理，故此認為提名委員會要把好關，嚴禁民主派人馬「入閘」。
打吡賽都有個提名委議會，評磅專員有酌情權挑選一兩匹評分較低，但可能（在佢眼中）有機會嘅馬入閘，故意製造爆冷可能性，今次就有一匹由「匯豐團體」擁有嘅14號「威風猛將」評分只得85，與1號「步步友」相差30分，而同負126磅，計數就輸硬，偏偏抽中第1檔。翻查過往三季沙田A跑道，跑2000米嘅檔位取勝率，1檔最高，勝出率20%入三甲機會高達60%，反而5檔「步步友」取勝率係零，9檔「風花雪月」、10檔「威爾頓」嘅取勝率亦同樣係零。唔通真係咁邪大熱會倒灶，好似羅范椒芬咁講，入到閘就可以有權爆冷？再三刨馬後，大摩隻馬只可放棄13號，一於五隻馬互串，1、2、4、14再加隻9號「火紅人」，再買多條2號膽，拖1、4、14、9、6（黃志祥隻「信利多」）。