【澳門直擊】前晚一連兩場「EASON'S LIFE澳門演唱會」在澳門金光綜藝館舉行，陳奕迅（Eason）老婆徐濠縈、囡囡康堤和陳父陳裘大撐場。Eason開場一口氣唱了24首歌，中間零吹水位，尾聲「吹神」才出現。
問識唔識李克勤
Eason在個唱甫發言先說：「啲聲得唔得？」又說：「原來係得我一個唔好聲囉！因為我個earphone，我仲死唱爛唱，個earphone啲聲大到呢，我個耳管特別敏感，我仲後生，可能有啲人越來越唔得。」呻完一輪，即刻有工作人員為他調好耳機，Eason打圓場說：「舒服好多，都係講笑啫。」
Eason又提到李克勤，但觀眾無反應，他問：「你哋知唔知李克勤係邊個？」全場爆笑，Eason乘機說：「好難講㗎呢個世界，有時我都唔知邊個邊個，都係唔好開名啦，嗰啲人以為我哋識晒成個娛樂圈所有人，打電話嚟話整兩張王菲演唱會飛，其實我真係唔識佢囉，只係同一個經理人，同佢唔熟；又有人打嚟要劉德華（飛），但劉德華又冇tour喎！你哋啲香港人真係敏感，諗多咗囉，點解我咁鍾意唱歌，咪因為唱歌唔使諗嘢，I am follower。」
之前曾在香港個唱大吐苦水的Eason，突然又一本正經呻辛苦，似向着台下的阿徐說：「我好辛苦，有少少正經嘢想講，呢幾年好辛苦呀，做唔番自己。」然後忽將話題拉到他日前鬧爆一間食肆的事。Eason一口氣吹了10分鐘，最後他說：「唉！你哋買嘅飛淨係包唱歌，唔包講嘢。」又一次說明吹神隨時可以吹爆你！
採訪：馬建華
攝影：黃偉雄