據講有媒體打算用每篇報道嘅「like」數目多少，嚟斷定一篇文嘅受歡迎程度，聽落都幾合理；但諗落又有啲唔對路，總係有啲本末倒置囉。因為好文章唔容易界定，但係點樣可以博多啲like呢，就好易掌握；只要你揸緊兩大宗旨，咁你就隨時都可以變身「博like天王」！宗旨一：有彈冇讚；宗旨二，多踩少扶！
上個周末就有啲案例畀大家學嘢；第一單係德甲聯賽，有位球員（Sorry舜文我唔記得咗個名）喺禁區疑似俾人撞低咗，於是球證直指12碼點；誰不知喺對方球員都未say no之前，跌低咗嘅呢位球員反而即刻走去球證度自首，話畀球證知其實冇人撞到佢；於是球證收番個12碼，對手球員就埋去攬吓呢位仁兄，佢自己就輕輕一笑，大家心照。睇呢段片嘅時候，其實真係幾warm㗎，你like唔like先？
跟住喺上周中嘅歐聯，拜仁壓到阿仙奴氣都唞唔到，只不過洛賓先生嗰啲左插插右跌跌嘅行為呢，就真係睇到大家眼都凸出嚟，咁你憎唔憎先？兩單料都充份顯示咗人性，前者感動到你嘅心，後者刺激到你把口；擺上網嘅話，你估歌頌自首定鬧爆插水會有多啲人like呢？當然係鬧啦，仲多好多㖭！
前兩日香港傑出運動員選舉，睇見一個個長年累月搏老命嘅運動員扮到靚靚上台攞獎，替佢哋高興之餘，post張相上網嘅話，你估一句「恭喜李慧詩！」多啲人like，定係「點解冇曹星如嘅？」多啲人comment呢？事實證明，後者先係網友嘅焦點，勁過ATV焦點。
上一代鍾意開口埋口講加油，呢一代like網上網下一齊抽水；喺人人都係記者嘅今日，「呃like」已經成為咗我哋每日嘅人生目標！所以咪使旨意我會讚你，除非你讚好咗我先啦！
KEYMAN
now TV主持