羅霖與劉坤銘離婚後各自精采，羅霖闖影壇床戰關楚耀成為焦點，原來劉坤銘也不愁寂寞！日前劉坤銘與一名年約30多歲、打扮純樸的疑似內地女子撐枱腳嘆茶，之後兩人漫步ifc，又到行人天橋欣賞海景談天，全程有傾不盡的話題，氣氛浪漫，女方還報以含情甜笑，劉坤銘亦不禁輕搭女伴背部，兩人發展得相當低調含蓄。
曾任仁濟主席的劉坤銘與羅霖前年離婚，結束16年婚姻，兩人共同撫養三名兒子，但感情生活已各走各路。羅霖全力復出與關楚耀拍攝陶傑初次執導的電影《愛．尋．迷》，她在處女作中大演情慾戲，令人眼前一亮，保養得宜的她離婚後更與北京富二代傳緋聞。
笑晒雞啄唔斷
至於劉坤銘的生活原來也多姿多采，並不是空白只顧湊仔，本報日前在中環ifc目擊他約會一名年約30多歲的疑似內地女子。該名女子身穿淺藍牛仔恤衫配緊身牛仔褲，孭着背包，打扮樸素沉實，純樸女輕掃淡淡脂粉，與羅霖的艷麗性感形成很大對比。劉坤銘與純樸女嘆完下午茶，至黃昏6時多，二人齊齊漫步到行人天橋觀看維港海景睇日落。
二人獨處過程舉止都十分含蓄，走路保持少許距離，兩人行到近碼頭的平台時，天色開始昏黃，密雲滿佈，但仍無損二人雅興，劉坤銘全程唔停嘴、手部大動作介紹維港海景，指手劃腳滿面笑容，彷彿有着講不完的話題，女方也一臉受落，間中情不自禁報以含情笑容，劉坤銘見狀輕拍女伴玉背，未有進一步親密身體動作，相信兩人仍在開始了解之中。
由於現場很大霧，日落看不成，二人傾談僅幾分鐘，便回程到ifc取車。劉坤銘返回其積架房車時，即展示紳士風度企定左邊，禮貌地讓她上車，純樸女卻搞笑地走到司機位位置，似乎未分清楚香港是右軚車，兩人均報以儍笑，之後齊齊上車，未知是否繼續約會吃晚飯。
羅霖：祝福佢
劉坤銘與羅霖結束16年婚姻，二人不時會為三名兒子的撫養權有分歧，更試過公開罵戰，關係一般。記者昨日致電羅霖提到目睹她的前夫與30歲純樸女子漫步ifc睇日落，她說：「真係完全唔知，我哋離咗婚後大家冇私下溝通，有乜都經律師，message都係經過工人，唔肯直接對話，啲仔都冇講畀我聽，佢都應該未帶畀小朋友睇住，如果佢有另一半我會恭喜佢、祝福佢，戥佢開心，總之我身邊朋友有幸福，都會祝福佢哋，我唔鍾意恨一個人，恨一個人自己都會唔開心，一直以嚟都想同佢做番朋友，為咗三個仔都想保持朋友關係。」記者告知劉坤銘約會的女子與她打扮風格大不同，羅霖即笑言：「呢啲好難講，男人唔同年紀有唔同喜好，我唔係好清楚。」
問到兩人共同撫養三名兒子，感情生活會否考慮他們感受行先，羅霖說：「大家都各自自由身，唔會干涉，鍾意乜都冇問題，唔好影響小朋友，如果我真係投入新感情，佢哋都係經佢哋批准，𠵱家部份係朋友階段，會觀察幾個月先投入某一段感情，覺得佢係適合對象，又要接受我三個仔，慢慢佢哋接受，唔會急進。」
採訪、攝影：羅德光
