我求大俠除咗係足球迷，仲係港產片迷，星爺主演嘅《九品芝麻官》簡直翻睇咗冇100都有90次；星爺、達哥、蔡少芬等主角嘅演技固然精湛，套戲嘅對白亦都好啜核，除咗可以用「用明朝嘅劍斬清朝嘅官」嚟暗諷維基台呢期嘅處境，星爺暗寸「尚書大人真係機靈，風吹去邊就擺去邊」亦都好正，聽日雙紅會賽前，尹佩斯忽然又話一世效忠曼聯，咦！佢幾時做咗尹尚書？
變臉讚莫帥好掂
紅魔1、2月期間戰績低迷，不時傳出尹佩斯對球隊心淡，一時話佢對領隊莫耶斯嘅排陣同操練方法不滿，一時又話準備今夏走人，仲想回流阿仙奴。歐聯作客奧林比亞高斯輸波，尹佩斯又話隊友唔醒水，塞住晒佢嘅空間，搞到佢冇威脅埋門。大家都認為30歲嘅尹佩斯，喺曼聯已進入倒數階段；但見曼聯呢排聯賽戰績好番少少，佢就尚書大人上身，周四接受訪問時就話：「我喺曼聯好開心，我加盟曼聯時簽咗4年合約，剩低兩年仲會留喺球隊，我希望有更長合約，甚至永遠效力曼聯至退休。」仲話之前所有傳聞都唔係真！
之前傳出佢如果知道費Sir咁快唔做，由莫耶斯接手，當初更加唔會加盟曼聯，今次亦都順勢變埋臉，竟然講：「莫耶斯嘅練習方法好有效，我感覺自己每日都進步。」我求大俠聽完都不禁要講句：「講呢啲？」尹佩斯今季只得11個入球，比上季轟入26球拎到神射手，比率上跌好多，如果咁都叫進步，真係唔知講咩好。
其實尹佩斯做尚書大人都唔係第一次，之前由阿仙奴轉投曼聯，講過倒戈入波唔會慶祝，不過季初主場對阿仙奴入波後，佢就嚟個鏟草式慶祝，激到唔少廠迷紮紮跳。不過點都好，聽日主場對利物浦，都算係曼聯今季生死戰，尹佩斯肯做番場戲，扮到球隊上下一心好和諧，都算係好事。
曼聯今仗最大威脅，梗係剛奪取英超2月最佳球員嘅史杜列治；史杜列治賽前出席贊助商活動，近距離睇吓個世界盃，佢就爆私底下叫紅軍隊長謝拉特做占士邦，話佢好似呢位英國特務咁無所不能，睇吓佢哋今次到訪奧脫福，又可唔可以完成任務，攞晒3分。
