平治車手咸姆頓一向新聞多多，尤其係衰嘢。新一季嘅F1今個周末開鑼，外界都睇好咸仔有機會趁維特爾架紅牛唔掂而重奪冠軍，點知未開賽咸仔就瀨嘢，開口夾着脷，疑似對前輩不敬。
車神舒密加滑雪意外後一路都昏迷緊，周四進行澳洲站賽前訪問，有記者就問咸仔點睇舒密加呢件事，佢當然都係講啲正路嘢，話車神係賽車界傳奇，又讚又盛咁；點知跟住語出驚人，話覺得事出必有因。呢一句「事出必有因」，事後梗係俾傳媒大造文章，話佢疑似暗示舒密加發生意外存在因果關係。
周五試車先苦後甜
咸仔由記招黑到上賽道，周五朝早進行第一次練習，佢架平治W05落場5分鐘就因為油壓感應器有問題而提早收工，行返去車隊大本營途中，着住成套戰衣都遇着個有眼不識泰山嘅「實Q」，要佢show證先畀入。不過去到晏晝第二次練習，咸仔就一吐烏氣，造出最快時間。（now671及672台今日1:50pm直播排位賽）