娛圈有好多隱蔽情侶，好似「打飛」同「啤酒」明明已經到談婚論嫁嘅地步，但死都唔肯喺人前公開關係，好心佢哋都唔係後生，唔通仲想走偶像路線咩。
土豪手多多
其實打飛同啤酒都忍得好辛苦，好似上次關仁見到佢哋以情侶檔出席電影公司嘅春茗，同場仲請咗好多內地土豪嚟飲。班土豪盲字都唔識多個，淨係識見到明星就影合照，特別見到靚女，好似打飛咁自然多人垂青。班土豪影相就影相啦，當正自己去咗夜總會搵小姐咁，搭膊頭都叫斯文，唔少土豪仲將隻手跌咗落打飛個臀部抽晒水，同枱嘅男朋友啤酒明明睇得一清二楚，不過就扮時運高睇唔到。你話嘞，咁都忍得，仲有乜嘢唔可以忍吖。
撰文：關仁