年近半百，皮光肉滑，生了三個寶貝仔，一條肚紋都冇，48歲的羅霖眉戚戚，眼眨眨說：「我可以着三點式，唔信畀泳衣相你睇！」因為不是賣廣告，半百女神泳衣照無緣公諸同好，不過，要見證羅霖凍齡之謎，或者看羅霖酥胸半露的性感演出，電影有聲有畫，那一幕離婚闊太羅霖肉搏洗頭仔關楚耀的政治密碼，又可能是大家愛尋找的一個謎！
撰文：楊潔雯
曾記得溫兆倫男人老狗扯火拍枱，急住澄清今年11月才年過半百，真正佩服在面前的羅霖，被導演陶傑當作宣傳工具指着笑，被指半百首部處女作，羅霖日前接受專訪時掩掩嘴笑着說：「係呀！係呀！笑死人，你已經好好話我四十幾歲，陶生猛咁話半百，提過幾廿百次。」
兒子鼓勵接戲
羅霖48歲拍電影處女作，埋位是大特寫袒胸床戲，跟細17年的關楚耀埋身肉搏，有人說重口味，又有人說是反映現實，但是，對於育有三子，最大17歲，最細8歲的教徒媽咪來講，是一個矛盾，羅霖說：「個角色都幾大膽，其實喺接拍前都有掙扎，咁陶生搵我嗰陣我都差唔多考慮咗成個月，因為我係基督徒喇！我要返去禱告，亦都要同屋企人傾呀！尤其係兩個大仔，同我媽咪傾個角色內容係點樣，雖然我入咗行咁耐，但係我連螢幕初吻都未獻出過，今次唔單只要螢幕初吻，仲要有其他激情戲，對我嚟講最緊要係衝破個心理障礙多啲！所以開始，我係拒絕嘅。」
離婚前，羅霖是大家眼中的闊太；離婚後，頓成家庭支柱，破處之作，一定要認真考慮，她說：「第一，我始終係一個媽咪，我就係驚我拍完之後會點，雖然講佢哋可以接受，大仔安慰我話成日同我睇西片！錫吓嗰啲尺度好閒啫！咁第二個仔就問，錢多唔多？我話都OK嘅！佢話OK你就去接喇！老實講，我𠵱家要自力更生，我要搵嘢做，呢樣係事實。」然後，導演用誠意加陶傑之名作憑證，成功游說羅霖下海，她說：「陶生講嘢好叻，成個電影故事講咗個幾兩個鐘，講得好動聽，佢話激情場面我哋會拍到好似荷李活咁優美咁有美感，咁我同經理人商量，咁都OK！可以接受！最主要係因為陶生係才子，我相信佢會處理得幾好，於是就應承！」
關楚耀（Kelvin）曾經主演《喜愛夜蒲2》、《重口味》等鹽份高的電影，拍床戲素有經驗，處女下海的羅霖向Kelvin求教，她說：「之前嗰晚我係瞓唔着，同埋嗰日我自攜咗一支紅酒去，等自己可以放啲，relax啲，咁就飲咗少少，拍嗰時我都同關楚耀講第一次呀！就住嚟，跟住就同佢講：『唔好伸脷呀！』佢就叫我放心喇！投入就得㗎喇！真係到正式拍嗰時我哋好自然，同埋真係投入咗角色嗰度，我記住我唔係羅霖，我係一個闊太。」
自豪食極唔肥
羅霖床上激戰關楚耀，聽起來重口味，事實是Kelvin拍完腦充血，閱女無數的他大讚羅霖身材勻稱，皮膚水凝潤白，羅霖說要多謝媽咪：「咁多年來我係冇做運動，淨係去推脂，同埋我係食極都唔肥，嗰時做空姐飛印度、印尼，我做護士嘅媽咪問我係咪生蟲，叫我驗吓，去杜蟲；醫生又叫我照腸，飲啲螢光劑，醫生話原來我啲螢光劑係快過正常人10分鐘落到大腸，即係唔吸收唔係有蟲。」天生麗質，女士們後天努力吧！
服裝：Moiselle
化妝：Peggy Tsui
髮型：Jay、阿熙
