英超雙雄阿仙奴同曼城周中歐聯出局，歐霸盃唯一英超兵熱刺都睇怕命不久矣；周四歐霸盃16強首回合，主場出擊都以1:3大敗畀賓菲加，輸波之餘球隊後防表現都幾錯漏百出，中堅維頓漢同門將洛里斯等連番派膠，期間賓菲加教練謝蘇斯舉起3隻手指，暗寸熱刺失3球，寸到舒活起晒火。其實食完車仔4蛋之後，熱刺領隊舒活公開批評球員，同班球員開閉門危機會議期間，仲出現激烈爭吵聲，點知今仗佢哋依然故我，熱刺名宿連尼加之前已經講，舒活公開批評球員行動完全錯誤，得唔到球員嘅心，如果周日北倫敦打吡戰對阿仙奴有咩差池，幾可肯定舒活下季冇得再教熱刺。好彩熱刺賽前都收到好消息，繼對家奧斯爾對拜仁後受傷，要休息1個月；中場艾朗藍斯剛復操，未有足夠狀態應付今仗波，卡斯唐有望首次上陣，睇吓熱刺呢隻受傷獅子，對住殘「兵」有冇得反撲。