從良博上岸石詠莉鄧健泓撐枱腳快閃

從良博上岸
石詠莉鄧健泓撐枱腳快閃

【尖沙嘴】鄧健泓(Patrick)好識追女仔,先後同過索女原子鏸、李詩韻同龔嘉欣拍拖,不過年近40歲嘅Patrick口味越趨平民化;前年傳同豬扒港姐張嘉兒拍拖,最近又被指「貪就手」狂追一齊演出舞台劇《大酒店有個荷李活》嘅前組合Freeze成員石詠莉(Sukie)。聽講佢哋感情一日千里,拍拖唔夠兩個月已火速同居,早前Patrick外婆離世,Sukie仲陪男友同坐主家位置。

Sukie戴上冷帽及黑色粗框眼鏡,與昔日賣肉上位判若兩人。

Patrick拍拖負責埋單。

Patrick做柴可夫載着Sukie直駛往荃灣寓所方向。

淡妝包到冚

好似大前日Patrick與Sukie俾人發現喺尖沙嘴帝國中心一間韓國餐廳撐枱腳。夜晚9點幾,Patrick同一位女性朋友食飯,不過女方化淡妝、戴上冷帽及黑框眼鏡,好唔容易先認得出佢係Sukie,同佢以前賣肉博上位判若兩人,睇嚟Sukie今鋪真係有心從良博上岸。佢哋發現記者後即拿拿臨埋單,並由Patrick負責碌卡,一先一後行去停車場攞車。之後Patrick擺明有心撇低記者,車速時快時慢往荃灣方向駛,估計係一齊返Patrick喺荃灣嘅屋企。

前日記者致電問Patrick係咪同女友撐枱腳?佢話:「食飯啫,大家傾吓音樂上合作,嚟緊搵佢幫手,所以請佢食飯,食完飯佢要去朋友派對。」佢又否認同居話:「好多人都住荃灣,唔係同居。」Patrick話𠵱家感情事隨緣,問係咪默認同Sukie關係?佢賣關子話:「唔係默認,但我都就快40歲,如果下次有消息公佈,就係有伴侶要結婚。」睇嚟圈中好快又多一樁喜事。
採訪、攝影﹕李志明、吳耀輝

Sukie是前Freeze成員,如今從良準備上岸。
資料圖片