中文大學校董會主席鄭海泉最近忙到極，成日召開諮詢會，聽中大校董、中大教職員、中大校友及學生會嘅意見，據佢講，一共出席咗十次諮詢會，平均每次兩小時，都算長氣咯。諮詢啲乜嘢呀？咪係中大校長沈祖堯嘅連任問題囉！沈校長嘅五年任期在2015年中屆滿，還有十四個月時間，好似幾長，但如果沈校長唔願連任，或者啲「持分者」認為佢不宜連任嘅話，現在就要開始招聘新校長程序嘞，十四個月時間大概只係啱啱夠啫，睇吓港大用咗幾多時間搵人代替徐立之就知。
好彩，沈校長願意續任，鄭主席出席十場諮詢會後，知道有壓倒性絕大多數意見支持沈校長連任，大家都放心啦。上星期六（三月八日）有校友諮詢會在中大舉行，各中大校友會組織派代表參加，上海、華中（武漢）嘅中大校友會亦派人專程回港參加諮詢會，可見得校友好重視。左丁山懶懶地，冇去到，不過晚上去完林旭華嘅娶媳酒會之後，就由喜來登酒店趕過去金鐘港麗酒店參加新亞校友阮德添嘅娶媳婚宴，有不少中大校友出席，坐低之後，又見到「旺金旺銀」嘅金銀業貿易場理事長張德熙、張德貴兄弟，問張德熙：「你係男家還是女家賓客呀？」張德熙笑騎騎咁話：「成班喇沙老友嚟捧阮德添同學場呀！」
席間有不少中大校友講起早上之校長連任諮詢會，佢哋透露，幾乎個個發言都支持沈校長連任，可見校長深得人心。但與此同時，多數校友主流意見係希望沈校長在未來幾年要多多注視大學排名，諗出方法提高中大在世界大學排名榜嘅名次，唔好俾港大科大越拋越遠，甚至俾城大追趕上來，成為香港梗頸四。今年年初發表嘅三個排名榜，即 FT MBA榜、QS各學科排名榜以及Times排名榜，中大都表現平平，毫無突出之處，特別係在FT MBA排名前100名不入，校方雖然解釋係技術問題，但據左丁山收到中環商界校友嘅反應，好似唔多收貨，個個口出怨言，幾乎係群情洶湧。唔好話排名唔緊要，優秀學生與優秀教授選擇大學，首先就係睇排名，商界僱主、大學僱主亦然，中大校友五十年來在香港表現出色，為中大爭得名聲，佢哋要求中大當局，諗方法提升中大排名，並不為過。