阿里巴巴入股嘅文化中國（1060），前日復牌，一枝箭最高夾升咗4倍。電商大佬買殼兼睇好埋祖國娛樂事業。場內同瓣數有中星集團（055），街貨市值得1.5億銀，大平賣。
中星除咗印刷業，2007年後陸續開展娛樂事業，呢期啱啱喺北京成立辦事處，實行喺祖國大展拳腳。祖國經濟起飛，同胞消費力提高，而移動通訊或互聯網成為大眾生活一部份，媒體平台大增，好需要內容。
中星食住祖國文化事業黃金期，照計掂過碌蔗。事實上，中星2013年度小試牛刀，所拍兩套電視劇，成功賣斷，兼錄到超過20%投資回報率。
中星現價0.244元，相對於2007年高位4.95元，大跌95%，而市值只得文化中國最新市值152億元嘅1.6%，殘到爆！又後者文化中國，家陣PB高達11倍，場內同行，寰宇國際（1046）1.5倍、星美文化（2366）1倍。中星僅0.31倍，平咗一大截。
中星2007年8月配股近3億銀，貼近當時總市值，配股價高達0.9元。咪忘記，配售係以「先舊後新」進行，大、小股東接貨價大潛水74%。
憧憬大股東注資
再喺同年年尾，報載中星大股東薛氏家族，有意將自家Neway卡拉OK上市，集資高達10億銀。呢壇製作，始終要有着落，而中星既有娛樂事業底子，博大股東注資，變得幾順理成章。
喺舊年底（12月17日），一周兩件主打橙天嘉禾（1132），累升60%，娛樂文化股亦係熱炒焦點，獨漏中星！買中星，翻一番到0.49元，PB未有耐上到1倍。又中星市值，要睇齊當年卡拉OK計劃集資金額10億銀，係講緊要大升4倍到1蚊。
錢雋
細價股專家
本欄逢周二、五刊出