馬不停蹄走訪18區硬銷假普選嘅政制局局長譚志源，去到區區都係講差唔多嘢，有時都幾悶，不過佢份人勝在識得搞爛gag，好似噚日去到九龍城區議會，有區議員希望有心選嘅人早啲表態，譚志源唔單止認同，仲話可以幫手教路㖭。
譚志源話佢都好有興趣知道邊個想選，單係呢句「扮無知」，已經幫港府裏面唔少疑似特首黑馬解圍。然後佢又「呼籲」有心人早啲表態，等社會知道呢個人有冇料、有冇政綱同團隊，不過當然會早咗計選舉經費啦，跟手仲推銷埋自己，事關佢喺政府工作多年，歷任三位特首，所以都清楚做特首嘅歷程係點，若果有心人想知多啲嘅話，不妨約佢飲餐茶，佢好樂意分享所見所聞喎。