風水師嘅魔力真係大！話說周大福（1929）兩、三年前推出一套叫「日月星辰」嘅足金轉運珠（圖），一套600元人仔左右，主要串喺手鏈上做配搭，銷情普通，但最近一個月忽然引來強國人瘋搶，原來就係因為一位內地風水師喺微博做推介。
周大福董事總經理黃紹基（Kent）話，調查後發現有位好似「中國版麥玲玲」嘅風水師，喺微博建議各位今年想轉運，就用呢款轉運珠，結果搞到中港𠵱家斷貨。Kent強調，唔識呢位風水師。
呢件事又帶來其他商機，有淘寶商戶買入呢款轉運珠，自己織手繩配搭，再賣番出去。周大福法務部曾經諗過，要唔要阻止對方，但Kent就認為，要多謝對方免費幫公司做宣傳，決定公司內部搞織手繩比賽，設計一批手繩，日後可以連埋轉運珠一齊賣。