近期hit爆嘅韓劇《來自星星的你》，風靡中港台少女或者仲有少女情懷嘅中女，個個都幻想自己係千頌伊。不過李娜（圖）就唔係太感興趣，佢周二贏咗印第安韋爾斯賽女單第4圈後，有記者問佢有冇追《星星》，娜姐話劇情太幼稚，所以睇咗一集就冇追落去。娜姐8強會對施寶高娃，上演澳網決賽翻版，以佢走勢咁強勁，就算冇都教授嘅超能力，贏波應該冇咩難度。