保利香港4月春拍，估價最貴嘅一件拍品係潘玉良（小圖）1946年所作嘅《窗邊裸女》，保利香港執行董事張益修預計，呢幅畫至少值3,000萬元；中國及亞洲現當代藝術資深專家鍾嘉賢指，潘玉良大部份作品收藏於安徽省博物館，私人收藏極少，形容此畫屬於博物館級數。
潘玉良本身係一位傳奇嘅藝術家，1895年出生，原本姓張，兒時父母先後離世，13歲時被好賭嘅舅父賣落妓院，四、五年後遇到蕪湖鹽督潘讚化，對方為佢贖身並娶為妾，自此改姓潘。
潘讚化讓潘玉良讀書，修讀藝術，並於1921年留學法國，七年後回國，於上海美術專科學校任教；1937年開始旅居法國，生活清貧，以賣畫為生，但當時唔算出名嘅畫家。1977年佢喺貧病交迫之下離世，逾2,000件遺作後來被運回家鄉，收藏於安徽省博物館。
導演張藝謀曾經將潘玉良嘅故事改編拍成電影《畫魂》，由鞏俐飾演潘玉良，電影於1994年上映。