A股重上2000關，但港股就唔爭氣，埋單再跌145點，熱炒股如環保、醫藥、科網、彩票股全線回落。現階段究竟係撈貨時機，定係跟沽減磅呢？唐牛就選擇咗後者，事關今次熱炒股降溫，或多或少與銅及鐵礦石冧價，以及內地企債疑以爆煲有關。唔少同胞透過抵押企債、銅及鐵礦石，換取炒股資金，而家相關抵押品價格下挫，甚至分文不值，自然要將股票斬纜，熱炒板塊隨時會出現火燒連環船局面。儲局將於下周舉行議息會議，減債規模多寡，恐怕會成為大戶造市藉口，加上季結臨近，內地隨時又會爆發錢荒。咁多不明朗因素下，一動不如一靜！
市況偏淡，揀股從業績出發較穩陣。男士服裝股中國利郎（1234）日前公佈業績，全年盈利按年下跌18%至5.2億銀人仔，但下半年表現其實較上半年為佳，毛利率亦回升2.4個百分點至42.6%。
利郎主席王冬星喺業績報告講明，渠道存貨回復至接近健康水平，相信最困難時間已過。剛結束嘅秋季訂貨會上，定單亦有改善，旗下品牌「LILANZ」訂貨金額回復增長，另一品牌「L2」訂貨金額增長更擴闊到10%至15%。現價市盈率11倍，兼有逾6厘息打底，以復蘇股計絕對吸引，周線圖呈大圓底，反彈目標直指8蚊！
唐牛