阿牛曾健成因為舊年有份參與佢嘅民間電台非法廣播，被判罪成，俾法庭判罰款4,000蚊，但佢過期冇交罰款，法庭噚日要佢出庭交代。阿牛同裁判官講，為咗公民抗命唔會交罰費，更加唔肯扣保釋金代替罰款，寧願入去踎監。但係裁判官話涉案嘅傳票條例唔可以判監，阿牛想坐監代替罰款都唔得。
阿牛因為過期繳交罰款喺前排被捕，佢交咗4,000蚊保釋金重獲自由，但裁判官噚日研究咗一輪張傳票，發現罰則頂多只可以罰錢，唔可以判監，決定畀多兩個月時間阿牛，等佢喺5月12日或之前交錢，如果唔係，就會循民事途徑追佢數。阿牛即時話，無論畀幾多日、幾多年都冇用，佢呢世都唔會交罰款，直至大氣電波開放為止。