Wyman醉會男密友互鍊膊頭

Wyman醉會男密友互鍊膊頭

【中環】黃偉文(Wyman)同醫生密友吳偉民(Stephen)相知相交超過10年,𠵱家兩人喺半山單位同居。喺周日凌晨近3點,佢哋孖住現身中環皇后大道中,同行仲有兩男兩女朋友,大班人應該啱啱去完clubbing,見肚餓就去附近一間24小時營業嘅餐廳食消夜,Wyman同Stephen一馬當先行最前,其他朋友殿後,似乎唔想阻住兩人溫馨。
Wyman略帶醉意,行路都有啲唔穩陣,由於天色已黑,街燈又暗,Stephen旁若無人咁伸手幫Wyman鍊膊頭,見Wyman一副冧樣,Stephen再落多幾錢肉緊,實行雙手箍實Wyman圓大嘅身軀。之後輪到Wyman出手幫Stephen鍊膊頭,兩人沿途邊傾邊鍊,十足連體嬰一樣,如膠似漆。

【搭住吹水】Wyman同密友Stephen(右)喺街頭攬住傾偈,旁若無人。

【揼膊按摩】密友Stephen幫Wyman鍊膊頭按摩。DV圖片

【攬番密友】轉個頭Wyman(左)又搭住密友猛咁密斟。DV圖片

Wyman近年體重直線上升,見佢食消夜都好擦得。

留言悼黎堅惠

Wyman等人入去餐廳叫咗多款小炒,雖然Wyman近年體重飆升,但佢似乎冇減肥意欲,大大啖食得好暢快!約凌晨3點半,個個食飽晒後,Stephen就好有風度咁攞住張單去櫃枱找數。之後眾人先讓Wyman同Stephen上的士離開,搭車返半山寓所。
另外,Wyman噚日凌晨喺微博悼念啱啱離世嘅好友、時尚教母黎堅惠,佢留言話:「我有個朋友,大學時崇拜Madonna,常常給偶像寫信,同學都笑她素來前衞烈女一個,為何竟有如此老套的執迷?直到一天,大概是好多封信後,他們不敢再笑了,因為麥當娜真的給她親筆回了信。《奇洛李維斯回信》其實是她的故事。前天,這位朋友走了,卻留給世界無數美好的啟發。」
採訪、攝影:畢紹基、黃曉程、楊浩賢

Wyman寫嘅《奇洛李維斯回信》係故友黎堅惠嘅故事。微博圖片