馬來西亞航空班機MH370神秘失事，令整個東南亞陷於緊張懸疑狀態。如航機失事源於意外或技術故障，波音航空與馬航嘅聲譽損失大至無可彌補，如失事主因係恐怖襲擊，以後東南亞與東北亞嘅航空安全檢查必定緊張無比，我地坐飛機出門旅行，必定煩惱不堪！
藝術B嘅中學同班好友、天文學博士、專家L自柏克萊回港探親，去完內地、台灣、印尼之後，返到香港，覺得在亞洲乘坐飛機，輕鬆愉快，與在美國內陸旅行嘅煩擾相比（鬆皮帶，剝鞋，唔准帶水等等），亞洲簡直是旅行天堂。美國在2001年911之後，驚到面青，驚到歇斯底里，大大收緊咗旅行人士嘅人身自由，雖則話可以阻止另一次911，但恐怖份子襲擊美國目的之一就係要改變美國人輕鬆自由嘅生活方式，令佢地連旅行都避免不了恐懼思維、緊張兮兮，喺呢個層面嚟講，恐怖份子係已經成功咗。左丁山仲記得，911之前，到波士頓機場搭機去紐約，的士可直到機場門口，將行李交俾工人（porter），就直接去航機櫃台辦登機手續，二十分鐘後已坐在機艙內等起飛。911之後，自洛杉磯去三藩市，喺機場外排隊入內要半小時，check-in排隊半小時，跟住排隊作安全檢查，又搞45分鐘，差不多用咗兩個小時先至可以排隊上機，成個人已經疲乏不堪，諗起都冇癮，故此天文L呢日問左丁山：「幾時到柏克萊探吓我呀？」左丁山認真地回答：「提唔起興趣去美國。」
千萬希望馬航MH370失事，唔會係恐怖襲擊所致，以免以後亞洲機場都向美國TSA學習，滋擾乘客到暈。亞洲本是安全地方，伊斯蘭激進組織唔會向同是伊斯蘭教嘅馬來西亞發動襲擊啩？但中國嘅疆獨又如何？此航機由吉隆坡飛北京，逾半乘客係中國人，難道咁就成為襲擊目標？係咁意想吓，都不寒而慄。睇馬航失事新聞報導，有感而發嘅，就係唔睇美國報紙唔得，好似三月十日嘅INYT報導，就綜合咗香港、華盛頓、河內、北京、柏林、佛羅倫斯、紐約各地通訊員嘅採訪資料，中文報紙點樣可以比較吖，講美國文化霸權，人地係有實力支持嘅。