北京兩會噚日閉幕，過去呢個幾星期港區人大、政協除咗日日開會聽領導人最高指示外，其餘時間都係飲飲食食聯誼一番。雖然港區全國人大代表、政協委員大部份都住喺北京飯店、即係貴賓樓嗰頭，不過佢哋唔係好鍾意幫襯酒店入面啲餐廳，八方聽聞佢哋嫌啲餐廳質素麻麻，好多人出去外面搵心頭好餐廳食飯請客，但最巴閉都係旅發局主席林建岳，唔單止喺北京有自己餐廳做主場，仲特登空運個米芝蓮三星名廚上北京請客！
主場餐廳搞經民聯晚宴
話說本身係經民聯監事會主席嘅岳少，近年進軍飲食業，佢喺北京有份投資，搞咗間叫OPERA BOMBANA嘅意大利餐廳，呢間餐廳係米芝蓮三星名廚Umberto Bombana揸fit，去年中先正式開業。岳少早前同八方講，北京兩會期間大部份飯局都喺呢度食，仲喺呢個主場搞經民聯晚宴，佢為咗呢場大龍鳳，特登請Bombana親自飛去北京督師，烹調地道意大利菜宴客㖭。
八方聽講，當晚唔少嘉賓好似港區人大代表馬豪輝、全國政協常委胡定旭等，都係Bombana嘅熟客仔，值得一提係，Bombana專長烹調松露，唔少政商界名流喺拍賣會投到靚松露，都係交畀佢料理㗎。
講完食又講吓住，唔少人大、政協都呻北京飯店好殘舊，就連特首梁振英同全國政協常委唐英年今年都住喺同北京飯店相連、比較新淨嘅北京萊佛士飯店，點知唐唐住咗一晚就搬走，皆因兩會期間保安嚴密，佢間房連窗都唔畀開，焗到佢冇覺好瞓喎。
mailto:[email protected]