Samantha承認，本周殘咗很多。回報每天都「來回地獄又折返人間」，就算保得住個倉，精神上都似俾人打咗一身，上半場滿心歡喜睇中咗隻股，下半場升幅收窄得番個吉，一係就連震兩日趕走我呢類意志薄弱散戶。人仔弱過藥煲，強國經濟數據又失色，港股昨日竟然跌得勁過A股，通常來到如此絕望境地，就會有班老朋友係升幅榜度同大家揮揮手，先前有東岳（189）、再來是人和商業（1387），今次來到經銷五糧液的銀基（886）。
銀基過去兩年是52周新低常客，累計跌幅超過八成，股價昨一口氣反彈16%，助燃劑是多隻白酒A股漲停板，大陸券商唱好話，「塑化劑」和限制「三公」消費等因素已計入股價，不明朗因素有限，抗跌能力較高。有報道指，白酒板塊整體市值由2012年最高的8,000億（人民幣．下同）跌至3,000多億人仔，蒸發逾50%，而五糧液的朋友，貴州茅台股價已由年初低位的118蚊升至最高167.2蚊，反彈逾40%。
睇番銀基中期業績，由虧損1.8億港紙大增至7.7億港紙，基本因素冇得睇，就睇港交所股權披露，「女股神」西京投資主席劉央在1月終於氣餒了，雖然冇披露作價，但持股就降至5%以下的毋須披露水平，若真的想劣市尋寶，又信央姐效應，冷吼白酒股銀基。
Samantha
本欄逢周一、三、五刊出