如果問散戶最大嘅心願，高沽低揸肯定係其中一個，但真正做到又有幾人？根據港交所披露權益資料，佐丹奴（709）主席劉國權上星期四起，連續三日入市掃貨，雖然增持數目區區85萬股，平均價介乎4.955至5.017元，合共斥資422萬元。睇番佢對上一次增持，竟然成功捕捉低位，名副其實撈底王！
劉國權上次加碼佐丹奴，要數番2012年6月，集團當時首季業績差強人意，拖累股價拾級而下，劉國權就喺月中連環入市，以平均價4.962元共買40萬股。其後佐丹奴就展開超過一年嘅升浪，令人嘖嘖稱奇，以高位8.66元計，累積升幅接近八成，跑贏同期大市幾條街！早排佐丹奴公佈業績又係差差哋，劉國權再次出手，入市價咁啱同當年差唔多，究竟歷史會否重演？相信只有時間可以驗證。