有間投資公司狂掃曼聯股票，仲已經掃咗市場上24%嘅貨，唔通曼聯將會有新老細？曼迷唔使慶祝住，以格拉沙家族嘅老謀深算，點會咁易畀人搶走曼聯呢隻識生金蛋嘅雞吖！呢間投資公間使咗過億美元，其實都只係得到曼聯2.5%嘅股權，要易主相信冇乜可能喇。
格拉沙家族續掌權
根據美國證券交易委員會嘅文件顯示，投資公司巴朗資本密密掃貨，已經收購咗曼聯喺紐約交易所上市嘅24%股份。據報，巴朗資本用咗近1.5億美元（約11.65億港元）去收購呢啲股份；不過，格拉沙家族其實只係放咗10%股權出市場，就算有人買得晒都係得一成股權，而佢哋家族就穩穩陣陣拎住其餘9成。呢次巴朗資本只係掃咗2.5%嘅曼聯股權，根本冇資格話事。
巴朗資本喺官網度表示，「曼聯𠵱家股價低，因為遲遲未同Nike續約，同埋球隊今季表現唔好。其實，曼聯應該好快會簽Nike份約，我哋對曼聯嘅前景仲好樂觀。」據報Nike呢張約為期10年，佢哋每年會畀曼聯1億美元，總值成10億美元；曼聯𠵱家市值先得26億美元，換言之呢份贊助合約嘅金額已經佔球會市值近4成！分析員亦指巴朗資本無意收購曼聯，呢次增持只係策略性投資。
卡頓保執法雙紅會
受巴朗資本增持加埋盛傳同Nike續肥約嘅消息影響，曼聯周一嘅股價急升，收市價為15.84美元；但周二就有啲回吐，以15.74美元收市。
星期日曼聯將會在英超主場對利物浦，唔知紅魔嘅表現可唔可以同股價一樣急升呢？好消息係呢場會由卡頓保執法，佢今季執法4場曼聯比賽，紅魔取得3勝1和，包括喺英聯盃以1:0擊敗利物浦。