馬雲昨日為一眾散戶上了寶貴一課。阿里入主文化中國（1060），不少戰友（包括魏力）飛身入市掃貨，憧憬其成為中信21世紀（241）翻版，一開2.5元，無想像中咁高，但考慮到之前咁多「春江鴨」掃咗，等多陣，消化一下獲利盤再買。
之後衝到3.3元，以為絕塵而去，正想放棄追貨之際，文化中國就開始跌，回回下就到2.2元，「回咗三分之一，應該夠喇啩？」魏力向馬雲投下信心一票，落盤掃入。冇幾耐，彈上2.5元開市價，魏力以為再向3蚊邁進，點知轉頭就坐艇……去到下晝，2蚊都隊穿埋，眼見大勢已去，最後輸一成斬纜。
唔坐多陣有幾個原因：1）昨平均成交價2.28元，意味一街都係蟹貨，短期不易炒上；2）騰訊（700）可能會沽貨，難言見底；3）市況甚差，二三線股洗倉，故先行減磅。
弱市下，手機股表現標青，值得留意。晨訊（2000）估值極為低殘，但技術絕不遜色，早於2012年已推出4G-LTE模塊，今年博業績翻身！公司去年底發盈警後，股價拾級而上，見底味濃；流動資產淨值9億，跟目前11億市值相近，抵博！昨股價逆市炒高8%，收0.43元，成交飆升，反映大戶開始
進駐，目標睇升86%：8毫。
魏力
http://www.facebook.com/2012jason