昨日一隻文化中國（1060）玩殘唔少炒友，開市最多炒高4倍幾，點知冇幾耐失守「招股價」（即係開市價2.5元，呢個情況根本同炒新股分別不大），收市得番1.83元，高追朋友睇怕喊咁口。
上次中信21（241）有斬鑊，但唔代表次次有，加上媒體同互聯網醫療兩者之間，可想像空間差太遠，所以咪以為馬雲錢真係咁易賺，大家亦千萬咪忘記阿里巴巴喺香港上市嘅教訓。
馬雲錢難賺，對美容院來講，菲菲嘅錢一樣難。話說早前去某非上市大集團旗下R字頭美容中心試做treatment，亦預咗佢有「落閘放狗式」洗腦硬sell時間。
菲菲本來都好抗拒呢類美其名免費嘅treatment，不過見同集團其他服務品牌都未至於太過份，就姑且一試。點知，當決定唔買package後，個sales 180度變臉，把聲由高8度變低8度，擺明黑你面，搞到菲菲好似欠咗佢咁。Sales嘅嘢，做戲可以做全套就最好，否則喺客心目中全集團都扣分。
香港越來越多人肯試醫學美容，令美容市場更大。必瘦站（1830）已開始幫人做激光煥膚、做botox V面，成本雖高，但今年香港區運作開始入收成期。集團今年亦將醫學美容帶入內地，可成另一增長動力，加埋鄧普頓最近亦入股，股價應該仲有得去。
Fifi
本欄逢周二、四刊出