體育用品股似乎未有運行，特步國際（1368）舊年盈利倒退，被問到明星代言人謝霆鋒肯唔肯減代言人費，主席丁水波一句「人家收費，不會理會公司業績」，道出呢個殘酷嘅現實。不過商業社會就是如此，上市公司可以睇餸食飯，最緊要顧住小股東利益。
對於今年體壇盛事，巴西世界盃6月開鑼，丁水波就話，賽事喺巴西舉行，跟中國有頗大時差，公司會帶80個客戶銷售商，到巴西睇世界盃開幕禮，亦會喺央視世界盃時段播放廣告。
特步喺湖南衞視節目《天天向上》嘅冠名費，今年大約維持1億元人民幣。咁多贊助、宣傳費，難怪丁水波要即場為新上市嘅波鞋賣廣告，話公司用咗100人接力着住同一對運動鞋，跑咗三日三夜共1,000公里作測試，都話生意難撈！