一班忠實梁粉對鬍鬚曾一直「情有獨鍾」，上至金主陳啟宗、下至嘍囉林奮強，不時出言狙擊，最近連喺2012年3.25後名正言順變身新世界仔嘅鄭家純，都不忘加入批曾行列，話佢嘅財赤預警杞人憂天，擺明為最鍾意派糖收買人心嘅狼英出氣。但鬍鬚曾不單話之你，仲高調喺網誌還拖，舉動咁藝高人膽大，皆因佢後台夠強硬，有港澳辦力撐。
北京唔郁財金鐵三角
查實鬍鬚曾因為中央開到聲先留任嘅消息，已經係政圈人所共知嘅秘密。既然係中央「點燈」，佢梗係唔會怕嗰班雜牌梁粉軍，所以每次俾梁粉鬧完更加越做越興奮，證明自己仲有一定「影響力」。
八方聽聞，早前有港澳辦官員因事嚟港，都特別見咗鬍鬚曾，其間都問吓佢嘅最新工作情況。據了解，鬍鬚曾仲同對方講解咗最新發表嘅財政預算案內容，對方好細心聽完之餘，仲話支持佢嘅工作，證明喺梁粉連珠炮發之時，港澳辦對鬍鬚曾嘅支持繼續堅定不移。
有政界中人話呀，既然有港澳辦呢個強大後盾，鬍鬚曾真係睬狼英都有味，難怪佢敢於成日同狼英甚至成班梁粉唱反調。
另有政圈中人話喎，另一個顯示到阿爺撐鬍鬚曾嘅訊息，就係金發局主席史美倫早前公開表態，支持金管局總裁陳德霖留任。
成個政圈都知道鬍鬚曾、攞命陳同財經事務及庫務局局長陳家強，都唔係狼振英屬意嘅人選，早排梁粉先至周圍唱要拉攞命陳落馬、搵史美倫頂上，點知連直通天庭嘅史美倫，都公開撐攞命陳留任，睇怕史美倫都收到風，北京唔想郁特區「財金鐵三角」。
mailto:[email protected]