做過狼振英助理七年嘅前候任特首辦項目主任，終於回歸狼英懷抱，30出頭嘅佢噚日獲政府宣佈，委任為發展局局長陳茂波嘅政治助理，17號上任。
查實馮英倫一直獲狼英睇重。當年佢做港大學生會外務副會長，接受中央邀請率團北上訪問「破冰」，惹嚟坊間唔少爭議，但狼英卻睇中佢嘅「非一般見識」，所以主動招攬佢畢業後幫自己手。近得狼英當然係「紅」人，馮英倫現時都係中華全國青年聯會、廣東省青年聯合會同菁英會等成員。又一梁粉入政府，梁粉陣地「港人講地」隨即刊登馮英倫獨家專訪，引述馮笑稱自己冇地冇物業冇感情缺失，因為廚房熱先要入去做喎。