好多上市公司都會持續贊助某類活動，好似太古A（019）出晒名經常贊助香港管弦樂團等文藝節目，新鴻基地產（016）就專注贊助或者舉辦跟閱讀有關嘅活動，聽聞呢樣嘢同新地老闆郭炳聯十分鍾意閱讀有關，佢認為，應該搵樣自己都有熱誠嘅事去做贊助。
早排讀完《喬布斯傳》
郭炳聯係愛書之人，聽聞佢幾鍾意睇商業類嘅書籍，早排就讀完《喬布斯傳》。有時佢碰見高層同事想寒暄兩句，可能劈頭就問對方最近睇緊乜嘢書，之後話畀人聽自己睇緊乜，如果對方冇睇過，轉頭就會送出一本。有時佢仲會買一大堆書，自己未睇，先送畀同事睇，不過就唔會追問對方睇咗未嘅。
由於佢鍾意睇書，所以新地就集中贊助或者舉辦跟閱讀有關嘅活動，主力培養中、小學生有閱讀習慣。
新近佢哋就成立了「新閱會」，希望透過講座、贊助書展等活動，吸引小朋友多啲睇書。
不過，𠵱家啲小朋友最鍾意上網，要佢哋有睇書習慣，都真係要諗諗計，聽聞新地一班搞手正為止費殺思量。