衞冕嘅FC廣州（廣州恒大）喺噚日亞冠盃第2輪分組賽失分，作客對日聯橫濱水手，靠迪亞文迪嘅靚絕罰球逼和1:1，兩戰得4分暫時排喺G組第2。
賽前話有唔少傷兵嘅恒大，結果好似門將曾誠同外援前鋒穆里奇，都正選披甲；主隊水手嘅陣容亦唔弱，有大家熟悉嘅中村俊輔。開賽後雙方幾均勢，但水手就先喺21分鐘憑中村嘅自由球搞到對方禁區大混亂，結果端戶仁門前加一腳，助主隊領先。
水手有中村呢位罰球專家，恒大都有迪亞文迪；呢位意大利國腳38分鐘喺禁區外右路主射罰球，穿過人牆中楣底彈入，助球隊逼和1:1，執番1分；不過我求大俠覺得話晒作客，唔使輸波返中國都幾好，或者喺下輪分組賽又將獎金加吓碼，會贏得仲容易呢！至於連續兩場分組賽有波入嘅迪亞文迪，應該唔使好似上場賽後咁，因老婆揸車遲到要喺球場外呆等成個鐘；今次冇老婆管，話唔定仲跟埋成班隊友一齊去日本啲夜店慶祝㖭！
至於同組嘅全北汽車有前鋒李東國入兩粒，雖然最終俾主隊墨爾本勝利逼和2:2，但仍然以得失球差壓住恒大，繼續排小組榜首。