一位中大學生來郵，話自己有創業意念，諗到一個「新方案」，請左丁山介紹佢見黎智英。據左丁山所知，肥佬黎好似冇搞創投基金嘅噃，要創業，點解要見肥佬黎呢？卒之請呢位小師弟去搵中大創業研究中心項目總監蔡明都，蔡明都服務呢個單位，專門研究創業及協助有意創業嘅中大生如何開始，例如教佢地寫business model，business proposal，組織架構之類，並與其他大學合作，建立一個「天使投資者」（Angel Investors）網絡，等學生與投資者有機會碰頭、探討。上次Google主席Schmidt到中大談創業，蔡明都有份參與推動。
科大兩位曾姓校友推出「神魔之塔」，雖然被不少網民大駡係「神抄」，但一鳴驚人噃，得上市公司「雲遊」垂青，高價購入部份股權，令兩兄弟漏夜成為億萬富翁，「神魔」變成神話，相信必然刺激到不少科技工程系學生各展奇謀，一邊讀書，一邊創業。
上星期三，蔡明都在「名都酒樓」向新亞校友講「IT創業」，講教導學生如要創業，須具備三個頭腦，第一係商業頭腦，第二係為用家設計嘅頭腦，第三就係科技頭腦。有人問佢，假設中大有學生學習蓋茨，中途退學去創業，家長會點睇？蔡明都話到目前為止未見過這樣的個案，但以佢嘅常識判斷，香港人家長一定反對，係要學生完成學位課程先至講，以佢之大學經驗觀察，本地大學生絕大部份希望畢業後搵到一份「好工」，創業意欲不大，與史丹福大學嘅風氣不同。
一時之間，香港好難同矽谷相比，本地大學更難與史丹福相比，畢竟兩地嘅讀書風氣與創業文化大大不同。呢日在中環萬邦行外碰到一位史丹福校友L君，佢話在史丹福讀工業工程，讀到抽筋，閱讀書本與交功課、實驗接踵而來，忙到打電話俾父母都冇時間，佢現在係一間本地大學校董，話唔係幾明白點解啲學生好似讀書讀得好輕鬆喎。