阿里巴巴創辦人馬雲近月經常佔據財經版面，但係冇計，呢期真係佢最紅。唔講佢間公司係咪來港上市，淨係三個月內買兩隻殼股都已經夠晒話題。前晚佢再買隻文化中國傳播（1060）就令唔少股民坐艇，不過馬雲本人就好逍遙，喺來往扎堆（類似面書專頁）自爆正在歐遊，仲見過唔少高官㖭呀。
馬雲過去七日去咗美國、法國同埋意大利，佢話見過好多企業家，仲有唔少政府官員，包括上場冇耐、意大利39歲新總理倫齊，仲有法國幾位部長，傾起淘寶網上有賣法國同意大利產品，大家都好興奮咁話。不過馬雲冇提到，對方有冇關注翻版問題。
馬雲主要都係賣廣告，指淘寶舊年賣過美國華盛頓州嘅車厘子，不排除將來喺淘寶淘到意大利pizza同埋法國生蠔喎。佢已經打道回府，希望佢盡快話畀市場知佢想點啦。