零食股旺旺（151）前日舉行分析員會議，娛樂性相當高。據講管理層用咗大半時間介紹新產品，成個新品發佈會咁款，仲即場任試唔嬲。至於新產品名稱呢……就繼續貫徹旺旺「無厘頭」宣傳風格，非常咁盞鬼。
如當中有款叫「銀河酸奶」，主席蔡衍明形容，飲落會有「銀河的味道」（海迪只知牛河係乜味）。旺旺仲出埋杯麵和燕米粥，名叫「哎呦」（食完會哎呦一聲？）；仲有功能飲品，單名一個字「剎」（意思不明）。其他產品仲有常溫係奶昔、雪凍就會變雪糕的「吸吸冰」，以及果蔬汁同士多啤梨味米餅。
新產品無論是數量還是種類，都係前所未有咁多，反映旺旺喺舊有產品銷售放緩同競爭非常競烈的情況下，惟有搞創新，先有機會保增長。
仙女散花式的新產品攻勢，執行風險、宣傳推廣夠唔夠，呢啲問題其實唔容易manage；加上旺旺今次要進入的領域，本來就強手環伺，能否打響名堂，好難講。
不過，望一望同是消費股的華創（291）及百麗（1880），長線基金均已等無可等，死心走人。所以，喺市場冇嘢好買嘅情況下，有時只要有穩定表現，芬佬們可能已經會收貨。
究竟新零食味道如何呢？有份去會議的朋友仔不置可否。不過，他引述了蔡衍明一句話：「你們隨便試食，不好食的話，我們就死定了！」收到。
海迪