獲阿里巴巴相中嘅文化中國（1060），單日炒高1.9倍，今時今日，與雙馬玩具識於微時，乃唔少炒友嘅夢想，今日推介嘅奧思知（8325），絕對係黑馬之一。
奧思知原本喺泰國為銀聯經營POS機收單，去年11月與深圳快易捷訂立框架協議，取得後者控制權，後者同時正收購開聯通網路三成股權。開聯通主要喺內地從事預付卡業務及網上支付服務，更同時擁有互聯網支付牌照；收購完成後，奧思知將成為唯一擁有兩項業務牌照嘅第三方支付類上市公司，完全食正支付概念熱潮，一個字講晒︰sexy！值得留意，開聯通擁有嘅全國性預付卡牌照，內地只得6張，人行亦講明再批機會不大，開聯通壟斷地位毋庸置疑；再講，用簡單算術計，13億人除以6，即開聯通擁有逾2億同胞嘅個人資料，喺呢個大數據年代，絕對係無價寶。不是嗎？facebook用1,500億銀買起WhatsApp，無非就係睇中天量嘅客戶數據，雙馬情傾奧思知，一啲都唔出奇。
原為奧思知非執董嘅民企之父張化橋，日前升呢做埋主席，乃其首次擔任本港上市公司主席職銜，以佢人脈之廣及豐富金融經驗，加上過往無寶不落嘅作風（不足兩年令深控（604）市值勁升3倍），現時市值僅12億銀嘅奧思知，可謂錢途無限。
唐牛