【上環】早前商台惹咗唔少是非，當中包括李慧玲事件同楊崢跟黃宗澤嘅姊弟戀都搞到一鑊泡，身為商台高層嘅俞琤可能都真係幾頭痕。前晚9點半左右俞琤就約咗老友施南生密斟，唔知係咪搵朋友幫手或者吐吓苦水，不過唔係淨係佢兩個，仲有俞琤嘅密友兼且亦係女強人嘅何超瓊（Pansy），唔知Pansy席間有冇獻計呢？
大方等車唔怕影
前晚記者先見到施南生嘅七人車，停咗喺上環荷李活道一間叫做「鮨佐瀨」嘅高級日本餐廳門口，冇耐就見施南生先行出嚟，好快佢就發現有記者，立即通水畀餐廳嘅朋友，原來喺餐廳內嘅正係俞琤同Pansy。雖然知有記者影相，但俞琤同Pansy好大方咁先後步出，仲同施南生講拜拜。
跟住俞琤同Pansy就行咗幾步停咗喺某個位等司機嚟接，其間見佢哋相當好傾，俞琤係咁嘴郁郁，飲咗兩杯嘅Pansy明顯面紅紅，仲挨落俞琤身邊咬耳仔談心，喺鏡頭前都冇避忌。冇幾耐司機就揸住Pansy坐開架寶馬到場，俞琤同Pansy就相繼上車離開，估計係一齊返屋企休息。
採訪、攝影：朱志聰、徐錦池