有時邵善波幾可愛，似足童話《國王的新衣》內條細路，篤爆大人滿嘴謊言。
佢接受《明報》訪問，指中聯辦官員游說立法會乃正常，香港人要接受，更有趣佢指有議員只聽西環講。邵歸納出四點令梁政府與政界關係差，包括深紅背景、選舉撕裂建制、政綱有爭議性及有人只聽西環講，再加多一項叫做欠缺專業游說團隊。其實，梁政治上失敗好簡單，歸根究柢，乃欠「自知之明」。
梁振英施政失敗咎由自取
坦白講，邵善波分析係老生常談，梁決定去馬參選時，理應有透徹思考及應對方法。佢深紅背景係人都知，因為紅咗成三十年，做咗特首定必引起香港赤化恐懼，尤其當選翌日立即去西環謝票，單係呢張相，足以令佢蜜月期提早煙消雲散。第二點建制撕裂，2012年選舉怵目驚心，佢一手摧毀唐家多年政治基業，唐英年政治形象全毀，無理由會儍到認為選舉後坐低飲杯啤酒就會變成香港營，更可笑係根本同唐梁之事冇關，因為自由黨田少一系，唔理有冇唐梁仇恨，都係一個極難纏之政治deal maker，早在董年代，但凡問佢攞票，鋪鋪清，都要給予政治酬庸，2003年廿三條立法，反手一劍刺向老董，大家已見識過。曾蔭權見到田少必黑面，憎到出面，但仍採取鬥而不破方法，無他，形勢比人強，司局長經常要向自由黨乞票，如果特首為逞一時之快，公開同田少決裂，只會難為下邊同事。
至於議員聽命西環，唔能夠一竹篙打晒一船人，民建聯有組織紀律，只要事先摸好底，一般都deliver到九成票，工聯會難搞，因有嫻姐又要威又要戴頭盔，政治議題會跟大隊，政策議題就要威，所以政府要畀一段佢自己表演，砌完政府攞晒彩之後，再搵下台階歸隊。至於西環契仔契女如鼠王芬、謝偉俊，講明契仔女，自然聽命西環。政府在立法會冇票，有乜出奇，早在老董年代，梁錦松已公開表示六十個議員都係反對派。
第三點政綱有爭議，更加得啖笑，因真正有爭議之政綱承諾，根本從未提過，如強積金對沖、標準工時，現時所謂施政，多屬冇人反對之派錢福利措施。梁之失敗係欠部署，成熟一項推一項亂糟糟。
第四點政府欠專業游說團隊，其實又有乜關係呢？美國立法主導，國會游說當然重要，香港行政主導，提法案權力牢牢握於政府手上。另外美國乃奉行政黨政治，國會內有黨團、黨鞭、多數黨領袖、議長等協調立法議程、法案審議進度、幕後協商等政治工作，到表決前才由黨鞭做vote count表，通知白宮法案表決形勢，是否須針對性出動高層甚至總統去做幕後游說拉票。
梁振英深紅色背景，用負面宣傳打敗主流唐英年上台，已注定要當少數派政府，如果要有作為，必須與人為善，討好各方，做好施政部署，寧缺勿濫，累積民望。但佢反其道而行，黨同伐異、四方樹敵、八面威風，但在議會內又一票都冇，梁面對所謂四大難題，前朝早已面對過，田少嫻姐契仔女，早在曾朝玩嘢。
梁振英真正問題係三個字：「out」。與其怨天尤人，不如download套《House of Card》season 1頭幾集講教育改革法案角力，一邊在京開會一邊睇。
添馬男