𠵱家啲藝人鍾意多元化發展，好多人同一時間拍劇、拍電影兼唱歌，有啲仲會做埋生意，喺𠵱家環境嚟睇，為將來做好準備梗係好事，不過另一方面，一個唔小心，隨時出事！點解咁講，好似港男出身嘅黃長興，前排都開咗間法國餐廳做老闆，為咗宣傳餐廳，梗係會搵啲傳媒去餐廳影吓相，本來呢個做法都好正常，但係點知身為無綫親生仔嘅佢，竟然接受有線飲食節目《為食情報局》嘅訪問，仲走入廚房示範炮製傳統法國甜品。
節目如期播出
最初以為黃長興已經約滿無綫，所以咁公然接受有線訪問，不過馮仁昭打聽之下，原來佢仲有合約喺身，聽講佢初初以為以老闆身份做訪問，諗住問題唔大，但𠵱家就真係瀨晒嘢，當年同無綫只係有歌星約嘅關心妍，亮相有線接受廣東話專訪，即刻被封殺，長興話晒係親生仔，今次睇嚟有排煩！噚日都有搵有線了解呢件事，佢哋嘅發言人只係話：「節目會如期喺周五（14日）播出，其他關於佢同佢公司合約嘅嘢，要問番當事人。」
撰文：馮仁昭