【電視風雲】
【本報訊】港視開台再次受挫，港視員工及市民怒斥政府不斷搬龍門，藉口荒謬、毫無理據，令香港猶如倒退到「封建時代」，「唔係港視死路一條，而係香港死亡！」他們誓要再次走上街頭尋公義，「一定要企出嚟，唔可以俾政府一而再，再而三咁玩香港人！」
記者：袁樂婷 鄭啟源 楊潔雯 何慧斯
王維基於昨日港視員工大會上透露，下午2時接獲當局來信稱，超過5,000住戶接收，就要接受《廣播條例》規限，要申領免費電視牌照。
港視藝員首當其衝，群情洶湧。曾在政總集會時做街頭劇飾演「半澤直樹」諷政府的藝員陸駿光稱，政府阻撓只會令港視變得更強，更暗寸特首梁振英「俾天收」。陸與港視尚有一年合約，「我相信天無絕人之路，睇吓有乜路可以行，繼續向前進」。另一藝人高俊文質疑政府針對王維基，「點解咁忌王生？係咪外來壓力？離晒大譜！」
十壯士成員：係香港死亡
郭峰則指「擔心唔嚟」，會尊重王維基決定。艾威曾以「他朝君體也相同」回應港視不獲發牌，昨晚出席活動時難掩失望，「心情好沉重，覺得好奇怪，唔止我，應該全港市民都覺得奇怪，（政府）諗盡方法阻止」。早前他與商務及經濟發展局局長蘇錦樑碰面，「佢仲恭喜我哋開到台，唔知佢恭喜啲乜！」
「港視十壯士」成員蔡錦源對政府突以《廣播條例》阻撓港視開台感到憤怒。「理由好唔合理同冇邏輯」，不單是港視利益問題，更影響香港的營商環境，唔係港視死路一條，而係香港死亡！」
港視工會主席楊志豪直斥政府不斷搬龍門，「搬到連影都捉唔到，好荒謬！」工會暫未計劃發起遊行，寄望以法律解決。絕食反國教的保衞香港自由聯盟成員韓連山直斥政府粗暴，「玩得好盡，唔止係港視，其他政策甚至政改都一樣，鍾意點玩就點玩，完全唔將市民放在眼內，係非常可悲」。他指港人須看清梁振英的嘴臉，「要發出怒吼，唔可以肉隨砧板上」。
亂改遊戲規則「好唔公平」
曾發起無綫台慶日示威的李小姐指，政府再三阻撓港視開台「好離譜」，由申請免費電視牌照，到近日再以《廣播條例》攔路，一直隨意更改遊戲規則，「好唔公平，毫無理據，之前合法嘅𠵱家又變咗唔合法」。她指香港社會有制度，「唔係你鍾意改就改，變咗好似返番去封建時代」。她堅稱必定上街爭回公義，「對抗呢個遊戲嘅時間可能要好長，我相信仲有希望」。
中環白領Gloria去年因港視不獲發牌而首次上街，料不到連流動電視也受阻，「已經退咗一步，咁都唔俾做，使唔使咁絕？如果你係有呢個規限，點解唔一早講？」她稱很怕溫水煮蛙，港視事件令她感覺「開猛咗火」，尤其10萬人上街撐港視，政府竟置若罔聞，坦言對前景感心淡，「但我仍然會上街！」網上群組「政總抗爭留守日記」則發起「一人一花圈」行動，籲市民周日禮賓府開放日，「送花圈去689屋企」，哀悼香港已死。
人人怒吼
港視藝人
陸駿光
「所有做唔好事嘅人最後會俾天收又好，坐監又好，始終會有嘢收到佢哋！我相信天無絕人之路！」
港視藝人
張松枝
「以𠵱家呢個環境睇，都係開唔到台。𠵱家擔心合約到期唔再續新約，心情 梗係唔好。」
撐港視中環白領
Gloria
「已經退咗一步，咁都唔畀做，使唔使咁絕？好驚溫水煮蛙，港視令我覺得開猛咗火。」
港視十壯士成員
蔡錦源
「理由好無理同冇邏輯。唔係港視死路一條，而係香港死亡！」
港視藝人
艾 威
「覺得好奇怪，應該全港市民都覺得奇怪。之前見到局長蘇錦樑仲恭喜我哋開到台，唔知佢恭喜啲乜？」
港視藝人
高俊文
「政府喺呢方面針對人，點解咁忌王生？係咪外來壓力？離晒大譜！呢單嘢對藝人係非常差嘅消息。」
港視藝人
周家怡
「成件事對香港電視嚟講簡直係被結業，香港電視想做電視好似冇可能咁。」
保衞香港自由聯盟發言人
韓連山
「鍾意點玩就點玩，完全唔將市民放在眼內。睇清楚梁振英嘴臉，要發出怒吼，唔可以肉隨砧板上。」
單挑亞視網民
曾慶光
「電視都冇得揀，你估特首有冇得你揀？一定要企出嚟，唔可以俾政府一而再，再而三咁玩香港人！」
港視工會主席
楊志豪
「不斷搬龍門，搬到連影都捉唔到，好荒謬！」
