「千元神器」紅米令港人瘋狂，近排憑韓劇《來自星星的你》，發現雷軍有隻金蛋仲賣得，就是小米盒子，呢部體積同Apple TV差唔多的高清互聯網電視機頂盒早已登堂入室，有啲煲劇的師奶未知紅米手機，已知小米盒子，600幾蚊就能夠在電視睇過千部電影、電視劇以至綜藝節目，豈能唔搶呢？Samantha早排趁墟買番部，樓下老闆日賣10部，仲慷慨畀咗個折我，真係賺到笑。聽到港視（1137）的壞消息，睇嚟阿爺無非都係迫大家一係睇中央台，一係睇湖南衛視。
憑水貨老闆嗰句「邊有人仲睇香港電視劇」，Samantha就覺得機頂盒概念有得炒，云云股海終於搵到隻裕興科技（8005）。
裕興做數碼科技產品，仲係本港網絡電視（IPTV）機頂盒主要供應商之一。上半年裕興受採購意欲減弱、競爭加劇，加上季節性因素拖累，蝕緊2,577萬元，第三季雖然發盈警，但承着本港及海外客戶大量加單，首三季虧蝕金額已大幅收窄至79萬元，單是本港營業額就大增86.2%至7,130萬元，裕興亦話，長遠看好IPTV業務。
裕興上月發盈喜，料去年業績會扭虧，過去三個月呢隻股能夠踩住條10日線向上，昨突破旗形，料下周三全年業績前仲有得炒。
Samantha
本欄逢周一、三、五刊出