馬化騰旗下騰訊（700）剛落實入股準備去美國上市嘅京東商城15%，實行齊齊食大茶飯。京東商城嗰位40歲嘅創辦人劉強東，亦旋即被網民爆戀情，指佢喺美國遊學期間識咗位美少女。
據講，京東同騰訊嘅高層最早喺舊年1月，在港一個中國CEO年會上遇上，想傾合作，之後劉強東遠赴美國遊學，呢件事就擱置，直至舊年底劉強東由美國返來先至重啓談判。
網民唔止關心呢單刁，亦八卦呢位科網才俊嘅戀事，仲提供埋相片，指佢舊年遊學期間，脫胎換骨，成功搣走30公斤，仲識到一位被稱為「奶茶妹妹」嘅清華靚女學生章澤天，正在熱戀中。奶茶妹妹喺美國做交流生，但唔係跟劉強東讀埋同一間大學，只係搵朋友玩嘅時候認識，兩人食完餐飯後就撻着拍拖。